Thursday, February 17, 2011

വിഷമവൃത്തം

14



പിന്‍വിളി കേട്ടില്ലെന്ന് 
പരിഭവം പറയുമ്പോള്‍
നിനക്കറിയണോ,
വട്ടത്തില്‍ ചവിട്ടാന്‍ 
ഞാന്‍ പെടുന്ന പാട്...?


നീയറിയുന്ന വൃത്തങ്ങള്‍ -
ദോശ, സിന്ദൂരപ്പൊട്ട് ,
വട്ടമിട്ടിരുന്നാല്‍ കൊത്തങ്കല്ല്.


മാസാദ്യങ്ങളും കീശ കീറുമ്പോള്‍
അതില്‍
വട്ടമെത്താത്ത നാണയത്തുട്ടുകള്‍ ;
തുന്നിക്കൂട്ടുമ്പോള്‍ മറന്നുപോകുന്നത്
വ്യാസത്തിന്‍റെ സമവാക്യങ്ങള്‍,
ഘനവും ചുറ്റളവുകളും.


നെഞ്ചിടിപ്പുകള്‍;
വിലകൂടല്ലേയെന്ന്,
ഉപ്പിനും അരിക്കും മുളകിനും മാത്രം.


വട്ടത്തില്‍ കീറിയതു കൂട്ടിപ്പിടിച്ച്
നീളത്തില്‍ തുന്നുമ്പോള്‍
ജീവിതമിങ്ങനെ...


ചവിട്ടുന്നത് വട്ടത്തില്‍,
ഓടുന്നത് നീളത്തില്‍...
വരച്ചാലെത്താത്ത വൃത്തത്തില്‍
വഴിക്കണക്കിന്‍റെ  ചോദ്യവും!!!


(16..02..2011)

14 Response to വിഷമവൃത്തം

March 2, 2011 at 10:40 AM

ജീവിതം
ഒരു കണക്കുകളിയാണ്
ചിലപ്പോഴൊക്കെ
മനക്കണക്കുകളും....

ജീവിതവും
ഗണിതവും
കൂട്ടിയിണക്കിയത്...
ഭംഗിയായിരിക്കുന്നു...

ഞാന്‍

March 14, 2011 at 11:06 PM

പലിശ, പറ്റുപടി, വൈദ്യനും വാടകയും പകുത്തെടുത്ത പല കള്ളികൾ, ഋണധന ഗണിതത്തിന്റെ രസഹീനമാം ദുർന്നാടകം.
ഗണിതമല്ലോ താളം താളമാകുന്നു കാലം കാലമോ സംഗീതമായ്( ഗസൽ- ചുള്ളിക്കാട്.) കവിത പരന്നുപോയി . സ്ത്രീകളോട് പരിഭവിക്കുന്നതുമായി.

March 22, 2011 at 1:47 PM

വൃത്തത്തിലാവുന്ന ജീവിതം

December 9, 2011 at 12:45 PM

ജീവനം നാള്‍ക്കു നാള്‍ അസാദ്ധ്യമാകുന്നു പാവങ്ങള്‍ക്ക്.
ഒക്കെയും ശരിയാകും. ഒരു 'ലോട്ടറി' അടിച്ചാല്‍..!!!

June 8, 2012 at 8:21 PM

വട്ടത്തില്‍ കീറിയതു കൂട്ടിപ്പിടിച്ച്

നീളത്തില്‍ തുന്നുമ്പോള്‍

ജീവിതമിങ്ങനെ...

ചവിട്ടുന്നത് വട്ടത്തില്‍,

ഓടുന്നത് നീളത്തില്‍...

വരച്ചാലെത്താത്ത വൃത്തത്തില്‍

വഴിക്കണക്കിന്‍റെ ചോദ്യവും!!!

ഇത് കൊള്ളാം
ഇതെന്തൊരു ഫോണ്ട് കളര്‍ ആണ് കൊടുതെക്കുന്നെ ..? വായിക്കാന്‍ ബുദ്ധിമുട്ടുണ്ട് .!~

June 8, 2012 at 8:24 PM

വൃഥാവിലാവുന്ന വട്ട കൂട്ടയോട്ടം ...

June 8, 2012 at 8:40 PM

നന്ദി റഷീദ്‌. ഫോണ്ട് കളര്‍ മാറ്റിയിട്ടുണ്ട്.

June 8, 2012 at 8:53 PM

വട്ടമെത്തിയ്ക്കാൻ പാടുപെടുന്നതിന്റെ ബുദ്ധിമുട്ട് ഒരു സ്ത്രീ ഇത്ര മനോഹരമായി അവതരിപ്പിച്ചിരിയ്ക്കുന്നു.അതിലാണ് ഞാൻ അത്ഭുതപ്പെടുന്നത്....

കൃത്യതക്കുറവുള്ള ദോശയെ,ഒരു ദീർഘവൃത്തം പോലിരിയ്ക്കുന്ന സിന്ദൂരത്തെ,ഞാനാണെങ്കിലൊരു പക്ഷേ ഈ വിഷയം കൈകാര്യം ചെയ്യുന്നെങ്കിൽ ഓർക്കില്ലായിരുന്നു തീർച്ച...

മാത്രമല്ല,കവിത പരന്നില്ല.കുറുകിക്കൊഴുത്തിരിയ്ക്കുന്നു....

June 8, 2012 at 11:14 PM

:))))

June 9, 2012 at 12:04 AM

ജീവിതം വട്ടത്തില്‍ ,നീളത്തില്‍ ,ചതുരത്തില്‍ പിന്നെ എങ്ങുമെത്താതെ ..:(

June 9, 2012 at 12:06 AM

വായിച്ചു കഴിഞ്ഞപ്പോൾ എനിക്കു വട്ടായി.

June 9, 2012 at 10:01 AM

ചവിട്ടുന്നത് വട്ടത്തില്‍,
ഓടുന്നത് നീളത്തില്‍...
വരച്ചാലെത്താത്ത വൃത്തത്തില്‍
വഴിക്കണക്കിന്‍റെ ചോദ്യവും!!!

ജീവിതമൊന്ന് 'വട്ട'മൊപ്പിക്കാൻ പെടുന്ന പാട് ഇവന്മാരാരേലും അറിയുന്നുണ്ടോ ?

നെഞ്ചിടിപ്പുകള്‍;
വിലകൂടല്ലേയെന്ന്,
ഉപ്പിനും അരിക്കും മുളകിനും മാത്രം.

അവസാനം അത് വട്ടവും ചതുരവും ഒന്നുമാവാതെ നിലക്കുന്നു.

ആശംസകൾ.

June 9, 2012 at 11:45 AM

ഇക്കാണാവുന്ന കാശൊണ്ടായിട്ടും വട്ടചെലവിന് തികയണില്ലാന്ന് പറയണേന്താന്നാ പിടി കിട്ടാത്തെ.. ആരോടാ ഈ വാശി..! വട്ടചിലവിന്‍റെ നെട്ടോട്ടത്തില്‍ ഈ കൊള്ളി പുകയുന്നത് നേരത്തേം കണ്ടിട്ടുണ്ടെന്ന് തോന്നണ്.

June 14, 2012 at 12:23 PM

ആശംസകൾ

Post a Comment