പിന്‍വിളി കേട്ടില്ലെന്ന്
പരിഭവം പറയുമ്പോള്‍
നിനക്കറിയണോ,
വട്ടത്തില്‍ ചവിട്ടാന്‍
ഞാന്‍ പെടുന്ന പാട്...?
നീയറിയുന്ന വൃത്തങ്ങള്‍ -
ദോശ, സിന്ദൂരപ്പൊട്ട് ,
വട്ടമിട്ടിരുന്നാല്‍ കൊത്തങ്കല്ല്.
മാസാദ്യങ്ങളും കീശ കീറുമ്പോള്‍
അതില്‍
വട്ടമെത്താത്ത നാണയത്തുട്ടുകള്‍ ;
തുന്നിക്കൂട്ടുമ്പോള്‍ മറന്നുപോകുന്നത്
വ്യാസത്തിന്‍റെ സമവാക്യങ്ങള്‍,
ഘനവും ചുറ്റളവുകളും.
നെഞ്ചിടിപ്പുകള്‍;
വിലകൂടല്ലേയെന്ന്,
ഉപ്പിനും അരിക്കും മുളകിനും മാത്രം.
വട്ടത്തില്‍ കീറിയതു കൂട്ടിപ്പിടിച്ച്
നീളത്തില്‍ തുന്നുമ്പോള്‍
ജീവിതമിങ്ങനെ...
ചവിട്ടുന്നത് വട്ടത്തില്‍,
ഓടുന്നത് നീളത്തില്‍...
വരച്ചാലെത്താത്ത വൃത്തത്തില്‍
വഴിക്കണക്കിന്‍റെ ചോദ്യവും!!!
(16..02..2011)
